خاطرة … مسكين الرصيف
إذا نقولو مسكين الرصيف موش صحيح , احنا هوما المساكن , احنا اللي نمشيو على ساقينا و ما عند ناش لا بسكلة , لا موبيلات و لا كرهبة . راهو الرصيف يبقى ديما رصيف . باللغة الفرنسية الرصيف موش رصيف يقولولو trottoir يعني مركض مخصص للخيل, ما يولي عندهم رصيف كان في الصيف يصبو فيه كماين رمل , يغرسو فيه شوية نخل , ينصبو فيه كمشة parasols والرصيف يولي مكان للتصييف . في باريس يعملو هكا كل صيف .
احنا الرصيف عندنا لاهو مركض و لاهو مصيف , الرصيف عندنا شتاء و صيف يرصفوه أصحاب المقاهي بالكراسي و من قهوة تولي عندهم قهوتين و من حل وقتي يولي حوز تصرف الرصيف احتلوه بالسيف كذلك اللي يصلحو الكراهب و بعد ما كان عفيف نظيف بزيت ال vidange و المازوط طيرولو الكيف .
حتى البناية خذاو فيه باي : هدانهم للحيوط يخلف الردم و حسب رايهم الردم اللي ماشي يتلوح الرصيف أولى بيه . و إذا بعض الأرصفة يسلمو من هالاحتلال , نخليوهم مثال ؟ لا . نغرسو فيهم و في الوسط قد قد شوية بلايك وعدد من الأعمدة الكهربائية و طريف أشجار نحوضوهم و ما نتفقدوهم بالزبيرة كان كي الأغصان تولي كبيرة , المهم و أنو “الراجل” ما يمشيش على راحتو . ( الراجل هنا نقصد بيه اللي يمشي على رجليه ) .
زيد عاد هاك البرارك متاع الخضرة جاو للأرصفة بركوها . كيفاش تحبنا أعمال كي هذي نباركوها ؟ الرصيف منا تفك ولينا كي الكراهب نمشيو في الكياس و الواحد منا من المشي في الكياس ساقيه ماشي تتفرك الشيء اللي خلا الكراهب تتساءل : لشكون الكياس تصنع ؟ لينا إحنا معشر الكراهب وإلا للي يمشيو على ساقيهم ؟ على هذا السؤال جاوبهم رصيف متنرفز لقا روحو ما تمسش و بقا رصيف يربي ستة و ستين كيف , قال للكراهب : ما دام المترجل استرجل و ولى يمشي في الكياس علاش , يا كراهب , ما تسترجلوش و تترصفو فوقي و هكا نكون كيف الأرصفة الأخرى قمت بخدمة جليلة ما يقومو بيها كان معشر الأرصفة و كان ذلك كذلك .

حكايتي نحكيها تاعب دڤداڨ واش عملت فينا الستاغ
تونس في عين الزائر جنة وفي عين ابنها هم: من المسؤول عن هذه المفارقة ..؟
مطار طينة… بين صوت الجهة وصدى التفرد
المحرس/ مدينة كانت تُشبه الحياة…
الإستثمار في الطاقة: أين سيادة الدولة من هذا ؟
هل يمكن أن تكون حملات “الرافل” هي الحل ؟
صفاقس/ منتدى دولي للنساء صاحبات الأعمال حول الذكاء الاصطناعي
عبد اللطيف الزياني يبرم اتفاقية شراكة مع مؤسسة روسكونغرس الروسية للمعارض و المؤتمرات
صفاقس / المنتدى الاقتصادي والسياحي الدولي لتثمين زيت الزيتون التونسي ينجح في توسيع آفاق تصديره
الأستاذ الهادي بن معاوية رئيسا جديدا لاتحاد الخبراء العدليين التونسيين الجهوي بالمنستير
تسجيل عقود البيع وعقود الهبة على ضوء مجلة معاليم التسجيل والطابع الجبائي وقانون المالية لسنة 2019
الميـــــــــراث في مجلة الأحوال الشخصية
حقوق مكتري الأصل التجاري
جربة ميدون/ بورتريه حسن النجار: رحلة البحث عن الدكتوراه في التاريخ المعاصر …
ثمانية أيام في مدنين
صفاقس/ منتدى دولي للنساء صاحبات الأعمال حول الذكاء الاصطناعي
عبد اللطيف الزياني يبرم اتفاقية شراكة مع مؤسسة روسكونغرس الروسية للمعارض و المؤتمرات
صفاقس / المنتدى الاقتصادي والسياحي الدولي لتثمين زيت الزيتون التونسي ينجح في توسيع آفاق تصديره