يرحم من ربّانا و علّمنا نعيشو بأدب …

يرحم من ربّانا و علّمنا نعيشو بأدب …
– نقولو “للا و سيدي”
– نقولو “الله يبارك” و ” حاضر ”
-نقص من الحس ناس راقدة
– وطّي صوتك
– ماتحطش ساق على ساق قدام حد كبير
– ماتقعدش قاعد و تخلي حد كبير واقف
– اقف بعيد على الباب كيف ادق
– ما تطلبش حد مخر
– اقعد على الكرسي اللي مش مقابل باب البيت
– دق على الباب قبل ما تحلو
-كول من قدامك و بعّد الصحن من قدامك شويه
– ماتضربش بالمغرفة في الصحن
– ماتتكلمش و انت تاكل و ما تمرطقش
– قوم أول واحد من على الطاولة كيف يضيفوك
– استنى كلهم يقوموا كيف انت تضيف حد
– ما تمشيش لحد على غفلة
– تدخل ديار الناس أعمى و تخرج بكّوش
-في دار حد غريب ماتقومش من بقعتك
-استوي ظهرك و انت قاعد
– لم ساقيك و انت قاعد
– ممنوع اللبان قدام حد كبير
– ما تخليش اختك تخرج وحدها
– هيا ماشين نعيدو على العايله
– ايجا هز هالصحن لجارتنا فلانه وسلم عليها
– كيف تشوف حد كبير هازز قضية خوذ وصلها عليه
– انت مش على راسك ريشه
– ماتقارنش روحك بحد
-قول يعيشك قول سامحني اللي يطلب السماح الاول هو الاقوى
– ما تفكش حاجه من يد حد
-ماتسبقش حد كبير و انت تمشي
-حل الباب للكبير و للمرا
– وريني بعينيك مش بصبعك
– لبسة النوم ما ندوروش بيها في الدار اصلا مش نخرجو بيها للشارع
– عيب احشم اكبر منك
– حرام وما قالش ربي
– مترميش حاجه في الشارع
– نظّف الي مسختو
مهمتنا نزرعوا في صغارنا اللي زرعوه فينا والدينا .. يلزمنا نقتلعوا أزمة الأخلاق من جذورها ..
شوفوا المجتمع التونسي اليوم فاش قاعد يعاني …
صغيرك أمانة

مكرم سبوعي

الكاتب

شمس الجنوب

See author's posts