قرقنة الحنينة

أول فيلم في حياتي صورتو في قرقنة مع نادي سينما الهواة بصفاقس… اجمل مغامرة حياتية قعدت دابغة في بدني… ساعتها مشينا ثلاثة عزلكة بطولنا عندنا ماتريال كاميرا وما لازمها اما ما نكسابوا كان شوية صرف يشقشق في جيوبنا… البطاح كان بلاش يخلف على عاشور… قلنا نعديوا النهار نصوروا لقطات نعملوا عومة والعشية نروحوا… لا عندنا وين نباتو ولا باش ناكلو كانش حق قهوة في ثلاثة وحارة سواقر كريستال… ضربنا جمعة كاملة ساكنين واكلين من الخير الي تقول عليه موضوع على ذمة الغريب… حاجة ما ريتهاش في بلاصة اخرى… الصباح بكري واحن بايتين في الولي على الريق تعرضك مراء ومعاها بنتها مروحين بشواري الكرموس والعنب… تعرفك براني توقف البهيمة وتحيد على جنب تخليك تاخو غرضك من الغلة لين تشبع تعاود تخرج من ظل النخلة وتواصل طريقها هي وبنيتها …موش وحدة موش اثنين… تقاليد سواء في الرملة في العطايا الكلابين اولاد عز الدين مليتة المعاملة هي هي… يسرحوا البحارة و يروحو من الشرافي والا الدراين بلي جاب ربي يرميولنا كعبات اميلة والا قراض نرميوهم ع النار وناكلوهم فرشك…في الليل تلقانا مستدعيين في عرس كي المروقية…وليلة بعد ليلة قعدة باللاقمي ومحمصة بالقرنيط الشايح… عملنا فيلم على حد عرفنا وروحنا… ما نعرفش عليه هاك الفيلم وين طاح حيو اما لليوم مطعم المشية هاك بين اسناني…كل عام هالوقيت نمشي لقرقنة ما نرتاح كان غادي … ولازم طبعا الكرموس والعنب والاميلة والقراض… في مشروع “الف فيلم وفيلم” واحن من مدرسة لمدرسة نعلموا السينما للغشاشر حاطط مدارس قرقنة في الصدارة نفس الطيبة ونفس اللمعة في العينين…

الكاتب

المنصف ذويب

See author's posts